Abenduaren 5etik 8ra egingo da Durangoko Azoka. Aurten 60 urte beteko ditu, gainera. 1026 kultur nobedade egongo dira ikusgai, horietatik 694 liburuak. Zaila da hain aukera zabalean aukeraketa egitea. Elaiden proposamen bat egin nahi dizugu lagungarria izanen zaizuelakoan.
Harrizko bihotza
Karmele Jaio
Elkar
Hibridoa
Apunteak, ametsak, oroitzapenak, hausnarketak, pasadizoak… pentsamendu laburrak bildu ditu Karmele Jaiok alfabeto moduan antolatutako liburu berezi honetan. Era askotako testuak topatuko ditu irakurleak A-tik Z-ra. Munduari begiratzen dio idazleak talaia horretatik, eta bere fikziozko lanetan landutako gaietako asko ageri dira bertan, giza harremanak, besteak beste. Horretaz gain, barrura ere so egiten du, eta bere buruaren erretratu antzeko bat eskaintzen digu.
Txerriak eta loreak
Jon Arretxe
Erein
Nobela beltza
Azken urteotan Touréren sagan zentratuta egon ondoren, guztiz bestelako nobela beltza dakarkigu oraingo honetan Jon Arretxek. Hiri handiak alde batera utzita, trama berria idazlea bizi izandako hiru herrietan garatuko da: Basaurin, Gasteizen eta Arbizun. Eta etorkin, etxegabe, prostituta edo bestelako biztanle zaurgarrien ordez, negozio aitorrezinetan diharduten bertoko aberats eskrupulugabeek hartuko dute protagonismoa. Arbizuko hestebete-lantegi batean gertatzen den txistor lapurreta misteriotsua da abiapuntua, eta, hortik aurrera, umore klabean idatzitako trama beltza dator, erritmo bizikoa, elkarrizketa ugarikoa.
Enarak
Bernardo Atxaga
Pamiela
Nobela
Nobela honetako narratzaileak Arroagoia inguruko mendiak poliberdeak direla dio. Estilo berean adierazita, beldurrik gabe segurtatu liteke irakurleak poliatseginez irakurriko duela Enarak: suspensea aurkituko du haren orrialdeetan, umorea, sakontasuna, lengoaiaren erabilera arina, ausardia. Urtain da nobela honen lehen pertsonaia; pintore profesional bat, azkena. Enarak ere hor daude, etengabe hegan segundoko hamar metro eginez. Bernardo Atxagak berria den zerbait idatzi du. Aparteko nobela.
Gazako istorioak
Mikel Ayestaran
Ibon Plazaola (itzultzailea)
Alberdania
Lekukotza
Historiaren joanean, Gaza leku irrikatua izan da, eta inperio eta erresuma ugari lehiatu dira hura eskuratzeko. Lur zati txiki hori, desertuaren atari eta Mediterraneoko portu, kulturen eta erlijioen sorleku, mundutik isolatuta dago gaur egun blokeoaren poderioz. Liburu honetan, Mikel Ayestaranek iraganera eta orainera eramango gaitu Tutmosis III.aren garaitik Benjamin Netanyahurenera arte, eta konkistatzaileei beti aurre egin dien leku horretan bizitza nolakoa den erakutsiko digu. Ibilbide historiko eta pertsonal bat da hau, Gaza dozenaka bider bisitatu eta bertatik egunez egun informatu gaituen kazetariak idatzia.
Kontua eta zikina
Eneko Iztueta (idazlea)
Ibai Iztueta (idazlea)
Aritz Vieites (irudigilea)
Txalaparta
Komikia
1929 urtea, baserri giroa, eta, gau ilunaren erdian, ama-alaba batzuen heriotza. Hala abiatzen da Kontua eta zikina, egileek berek “euskal pop noir” moduan sailkatu dutena. 1960ko hamarkadara salto egingo du irakurleak gero, Donostiara. Rosaritok iraganeko sasoiak eta gertakizunak alabari kontatuko dizkio, eta, aldi berean, orduan bizi eta sentitutakoak berreraikiko ditu. Konfesioak, ohiturak, baserriko bizitza, familia eta familien arteko harremanak korapilatzen dituen lana dugu hau.
Esnatu ala hil
Garikoitz Goikoetxea
Iñaki Iurrebaso
Elkar
Saiakera
Noraez gisako batean dago euskararen indarberritzea. Ez dira garairik distiratsuenak. Premiazkoa da beste bultzada bat, orain artekoaz haragoko pausoak ematea, baina zantzu gutxi dago nondik eta nola ekin, are gehiago aldaketa handiko garai hauetan. Helduleku izan nahi du liburu honek, euskararen bilakaera eta egoera zein den ohartzeko tresna. Begiak zabaltzeko ordua da, izan ere. Euskararen biharko ametsak esnatzea eskatzen baitu gaur.
